Kusamvana kwakula ku Area 50 mmudzi mwa Ngomani ku Lilongwe komwe kumakhala malemu Thomas Chibade pomwe khwimbi la anthu lakaniza akumbumba kunyamula maliro kuti akayikidwe Ku Zomba monga mwachikonzero.
Zinafika povuta poti mpaka akumbumba anawathawitsa ndikuwabisa pomwe okonda nyimbo za Thomas Chibade anafuna kuchitira ntopola achibale a Chibade kaamba koti achibarewa sanakonzeke zoyendetsa mwambowu paokha.
Ena ati anthu okonda nyimbo za chibade komanso bungwe la oyimba mdziko muno ndi amene anasonkhetsa ndalama zoyendetsera mwambowu.
M’modzi mwa akuluakulu akubungwe la MUM a Alex Mkalo ati pakadali pano akumbumba avomereza zoyika malirowo Ku Lilongwe ku Area 18 osati Ku Zomba komwe malemuwa amachokera.-MBC ONLINE
